متل ما وعدتكون رولا بحلقة الفصح رح تشارككون وصفات من مواد طبيعية موجودة ببيوتنا لتلوين بيض الفصح..
يلا اسلقوا البيض لمدة عشر دقايق و بردوه نشفوه منيح و خلونا نبدا تحضير الصبغات الطبيعية..
الألوان يلي رح تطلع (الزهري _ البرتقالي _ الأصفر _ الأزرق _ الأخضر _ البنفسجي ..)

١- خلطة اللون الزهري:
*٢ كاسة كبيرة ماء
*٢ حبة شوندر مقشر
*١/٢ ملعقة كبيرة خل أبيض.

٢- خلطة اللون البرتقالي:
*٢ كوب قشر بصل أبيض
*كمية كافية من المي لتغطي القشر و تغمرو زيادة ٢سم
*١/٢ ملعة كبيرة خل أبيض

٣- خلطة الأصفر :
*٢كوب ماء
*١ ملعقة كبيرة كركم
*٢ ملعقة كبيرة روح الخل هي الخلطة بتعطي لون أصفر للبيض الأبيض و لون دهبي للبيض الأسمر ..

٤-خلطة اللون الأزرق :
*٢ كوب ملفوف أحمر
*كمية كافية من الماء لتغطية الملفوف وغمرو ب ٢سم
*٢ ملعقة كبيرة خل و هون رح تلاحظو انو البيض الأبيض رح يصير أزرق و البني رح يصير أخضر.
للون الحشيشي فيكون تستعملوا المتة كبديل عن الملفوف..

طريقة التجهيز : ع نار متوسطة وضع الماء مع المادة الطبيعية ( كركم - ملفوف - بصل - الشوندر ) حسب الكميات يلي سبقت و ما تنسوا تغطوها لمدة بتتراوح بين ١٥-٦٠ دقيقة لتوصلوا للون المطلوب..
خلوها تبرد و بعدين صفوها بوعاء، زيدوا ملعقة خل لكل كاسة من الملون المبرد، هلأ حطوا البيض المسلوق بوعاء الصبغة و ع البراد، لخمس دقايق و كرروا وضع البيضة نفسا بالصبغة و إعادتها ع البراد لتوصلوا للون المركز يلي بدكون إياه
وإذا حبيتوا تعطوا البيض لمعة ع قطعة قماش قديمة صغيرة شوية زيت زيتون او نباتي ما الو ريحة و امسحوا البيض فيها..

من فريق ما'ورد منتمنالكون أعياد حلوة متلكون..