كتير احيان منستعمل منتجات وفجأة بيصير معنا مشاكل ب البشرة متل حبوب أو احمرار بالعين وما منعرف شو السبب، وآخر فكرة ممكن تخطر ببالنا إنو عمر المنتج ممكن يكون خلص و تجاوز مدة الصلاحية.

معظم المنتجات التجميلية عندها مدة صلاحية حسب الفعالية والصحية، لكن هي المدة بتختلف من نوع للتاني

رح بلش هلق بالمنتجات من الأقصر عمراً للأطول:

الماسكارابين ٣-٦ أشهر
لأن بتلامس العين بشكل مباشر و بعد ٣ أشهر العلبة بتصير تعبي جراثيم

 

الكريمات ٦-٩ اشهر

إذا كان الكريم محكم الاغلاق ممكن يضاين ل ٩ أشهر أما يلي بعلب معرضة للمس اليومي يفضل تنرمى بعد ٦ أشهر 

 

الفاونديشين 9 أشهر- سنة 
بتنفصل المواد عن بعض و ممكن تتغير ريحة المنتج  و ما بيعود الها فعالية متل قبل و بنفس الوقت بتتجرثم و ممكن تسبب حبوب و بتسكر المسام 

 

قلم الحمرة سنة 

عمر قلم الحمرة بيكون بين السنة وحتى السنتين إذا تم حفظها ب مكان جاف و بارد نوعاً ما. منلاحظ بعد سنة انو بتخف فعالية الحمرة والملمس تبعا بيصير جاف والريحة بتتغير 

 

أقلام الكحل والكونتور سنة - سنة ونص

بتكون آمنة أكتر من غير منتجات لأن محفوظة وقبل كل استعمال بينبرا القلم بس بعد سنة رح تجف ويصير في صعوبة  بالتطبيق 

 

البلاش والباودر: سنتين 

دايماً عمر المواد اللي بتكون من باودر بتكون أطول من السائلة بس مع العمر بتنشف وما بيكون الها فعالية متل قبل يعني بيخف اللون 

مع التنويه انو ال eye shadow لازم يستعمل ب اقل من هالفترة لان بيلامس العين وبالتالي ممكن يسبب حساسية 

 

العطر بين ٨ و١٠ سنين 

لان ما في تطبيق مباشر على مناطق حساسة بالجسم والعلبة بتكون محكومة الاغلاق ف ممكن يضاين ل ١٠ سنين وإذا ضل بعد عشر سنين ممكن بس يصير في تغيير ب الرائحة 

 

وبدي نوه ع شي كتير مهم 

انو أكبر مكان ل تجمع الجراثيم والبكتيريا بيكون بل فراشي تبع المكياج مشان هيك لازم ينغسلوا ب مي وشامبو كل اسبوع مرة
كمان اذا ما منغسلهن بيصير يتجمع المنتج ع الفرشاية و ما بقا بتلقط منتج جديد
product build up